U-1398-02-05-0002
1398 Feber 5, Wien
Regest
Herzog Wilhelm von Österreich befiehlt Graf Hermann II. von Cilli, seinem Hauptmann in Krain, die Leute des Klosters Viktring zu schützen und Übergriffe seiner Burggrafen von Landskron und Reifnitz zu unterlassen.
Transkription
Wir Wilhalm von gots gnaden hertzog ze Oſterreich, ze Steir, ze Kernden, vnd ze Krain graf ze Tyrol etc. embieten, dem edeln, vnſerm lieben getrewen, graf Hermann von Cili vnſerm haubtm. in Krain vnser gnad vnd alles guͦt. Der erber geiſtlich, vnſer lieber, andechtiger vnd getrewer, der abbt von Vittringen, vnſer vordern ſeͣligen ſtifftung, hat vns aber furbracht vnd geklagt, wie dëm purggrafen ze Lantzkron vnd ze Reiffnitz, ſeins gotzhaws, armen lewͣten, in der Lantzkron vnd in der Raiffnitzer, gerichten mit tagwerchen, vnd dem gericht beſwerung vnd uͤberlaſt tuͦn, daz si verderben muͦessen, sunder, daz der purggraf ze Reiffnitz, ſeinen armen lewten, neme ir hew, aws iren hewͣſern, vnd were in ir holtz, daz zu iren hüben gehoͤret ze verkauffen, darzuͦ wer, er auch demſelben abbt, daz er ſeins gotzhaws, aigen holtz, ſeinen lewͣten, auch nicht getuͤrr, geben, ire hewͤſer ze peſſern, oder daz ze prennen, das vns gar vnpillich duͦnket, wann, das alles iſt, wider vnſers herrn vnd enen, hertzog Albrechts ſêlig priuilegi, daran er alle deſſelben gotzhaws lewt vnd güter, aller rechten vnd gewonhaiten, die wir darauf, haben gehabt, gentzlich, hat, ledig gelaſſen, vnd si dauor gefreyet, die wir auch dem ſelben kloſter beſtett haben, dauon emphelhen wir dir gar ernſtlich vnd wollen, daz du den egen. abbt, ſein gotzhaws vnd ir lewt, bei denſelben gnaden volliclich beleiben laſſeſt, sunder si dabei veſticlich haltest vnd ſchermeſt, von vnſern wegen vnd in ſolicher uͤberlaͤſte vorſeiſt, vnd auch nicht geſtatteſt, daz dein obgen. purggrafen ze Lantzkron vnd ze Reiffnitz, des yetzgen. gotzhaws arm lewͣt mit den vorgen. newungen furbas in dhainem weg beſweͣren, das iſt ernſtlich vnſer maynung. Geben ze Wienn an ſand Agathen tag, anno etc. nonageſimo ottauo.
Überlieferung
Insert in einer Urkunde Graf Hermanns II. von Cilli gegeben in Celje, 1399 Dezember 13.
