U-1469-04-12-0001

1469 April 12, Sankt Veit an der Glan

Regest

Friedrich III. gewährt der Stadt Klagenfurt zusätzlich zum Wochenmarkt am Donnerstag einen Markttag am Montag.

Transkription

Wir Fridreich von gots gnaden Römischer kaiser zuͦallenzeiten mereͦr des reichs zu Hungern Dalmacien Croacien etc. kunig hertzog zu Oſterreich zu Steir zu Kernnden vnd zu Krain graue zu Tirol etc. Bekennen fuͦr vns vnd vnſer erben vnd tuͦn kund offentlich mit dem brief allermeniclich daz wir vnſern getrewn lieben dem richter rat vnd vnſern burgern gemainclich zu Klagenfuͦrt von irer fleiſſigen bete vnd ſundern gnaden auch ires vnd derſelben vnſerr stat nucz vnd aufnemens wegen zu dem wochenmarckht, ſo sy vor wochenlich an phintztag haben mer ainen wochenmarckht wochenlich an dem montag zuhaben vergunt erlaubt vnd von newem gegeben haben wiſſentlich in kraft des briefs. Alſo das sy vnd ir nachkomen den nuͦ hinfuͦr zu ewigen zeiten daſelbs zu Khlagenfurt wochentlich an dem obberürten montag mit allen den eren rechten freyhaiten vnd gewonhaiten mit kauffen verkauffen haben halten vnd des gebrauchen muͦgen inmaſſen als sy den wochenmarkht an dem bemelten phintztag halten vnd annder wochenmerckht in vnſerm fuͦrstentuͦmb Kernnden gebraucht vnd gehalten werden von meniclich vngehindert. Dauon gebieten wir den erwirdigen erſamen andechtigen edln vnſern lieben getrewn allen vnd yeglichen vnſern preleten frein herrn rittern vnd knechten verweſern phlegern burggrauen lanndrichtern richtern reten burger[…] vnd zollnern gemainden vnd allen anndern vnſern ambtleuͦten vntertanen vnd getrewn ernſtlich vnd wellen daz sy der […] richter rat vnd vnſer burger gemainclich daſelbs zu Klagenfuͦrt vnd ir nachkomen bey dem obbemelten wochenmarckht […] diſen vnſern gnaden genntzlich beleiben vnd sy auch annder leuͦt mit iren phenwerdten vnd kaufmanſchefften damit sy den yetzuzeiten beſuchen werden des berublich gebrauchen laſſen vnd in daran dhain irruͦng noch hindernus nicht tuͦn noch des yemands annderm zetuͦn gestattten in dhain weis, als lieb in allen vnd ewr yederm ſey vnſer ſwere vngnad zuͦuermeiden. Das iſt vnſer ernſtliche maynung. Mit vrkund des briefs. Geben zu sannd Veit in Kernnden an mittichen nach dem suntag quasimodogeniti. Nach Criſti geburt im vierczehenhundert vnd newvndſechzigisten vnſers kaiſertumbs im achtzehennten vnſerr reich des Römischen im newnundzwainczigiſten vnd des Hungrischen im aindleften jaren.

Beschreibung

Ausf. Perg.

1 Sig. pend. besch.

Archiv

Ausfertigung

Kärntner Landesarchiv, Ständisches Archiv, Urkunden, Landständische Urkunden, B 11 [AT-KLA 457-B-11].

Nachweis

Regest

Wiessner, Hermann: Die Kärntner Geschichtsquellen 1414–1500 (Monumenta Historica Ducatus Carinthiae 11). Klagenfurt 1972, Nr. 410, S. 164f.