U-1433-12-04-0001
1433 Dezember 4, Krapina
Regest
Graf Hermann II. von Cilli stiftet zum Gedächtnis Graf Friedrichs von Ortenburg und seiner Familie sowie zum Gedächtnis der Cillier einen Altar in der Pfarrkirche von Spittal an der Drau.
Transkription
Wir Herman graf ze Cili vnd in dem Seͣgeͣr etc. wan in Windiſchen lannden bekennen für vns vnd all vnſer erben vnd auch für all die nach vns vnſerer herrſchafft Ortenburg erben vnd beſiczen wellen vnd tun chundt mit dem offenn brief. Wann nu in diſem krankchen ze ergeͣnkchlichn leben nichts loblichers noch beſſers iſt, denn darnach ze trachten ze tün vnd ze gedenkchen wie man vor allen ſachn gottes lob vnd dienſt gehöhen vnd gemeren müg vnd den seelen die ewge rüe vnd frewde verdiennen vnd alſo haben wir mit wolbedachten müt die zeit vnd wir es wol getün möchten allen vnſern voruorden vnſerer vnd aller vnſer nachkomen vnd ſunderleich des wolgeboren vnſers lieben oheims graf Fridreichs von Ortenburg lobleicher gedeͣchtnüss allerſeiner voruordern die awss ſeinen geſlecht vnd aws derſelben herrſchafft Orteburg verſchaiden ſein vnd allen gelawbigen ſeelen ze hayl vnd zetroſt vnd ze vördriſt got inſeiner ewichait vnd der heyligen vngetailten driualtikeit vnd der hochgelobten hymliſchen kunigin vnd mütter magt Marien vnd allen heyligen ze lob vnd ze eren von vnſerm aigen güt von newen awſſgericht vnd geſtifftet einen newen altar in der pharrkirchen zum Spital vnd Ortenburg vnd darauf ein ewige mess mit einem ewigen kapplan vnd den wir haben laſſen weihen in dem namen vnd zelob vnd ze eren der heyligen frawen sand Annen vnd haben die ſtifft getan vnd awſſgericht mit des hochwirdigen herren vnd in got vatter vnſers lieben frewnde hern Johannſen erzbiſchoue zu Saltzburg vnd auch mit vnſers getrewen andeͣchtigen hern Hermans die zeit pfarrer zu Spital gunſt vnd gütten willn in ſölher weis das im hinfür ewikleichen ein yeder kapplan deſſelben altars für vns vnſerer voruordern vnd nachkömen vnd auch fur den benantten graf Fridreichen von Ortenburg ſeͣligen vnd all ſein voruordern die aws demſelben geſleͣcht verfaren vnd verſchaiden ſein, andeͣchtikleich vnd ſteͣets in ſeiner meſs bitten ſol wenn vnd alſofft in des got ermandt vnd alſofft dieſelb capplaney vnd phründe mit dem tod eins kapplans ledig wirdet das wir vnd all vnſer erben vnd nachkömen die dan allzeit einen andern redleichen prieſter der vns darczu geuelt verleyhen mugen vnd welhen wir die verleyhen den ſol ein pfarrer zu Spital alſpald wir im den mit vnſerm offenn brief ſennden vnd preſentiren darauf vnuerzogenleichen mit geiſtlichen rechten beſteͣtigen vnd alſo haben wir gegenwürtikleich vnſern getrewen capplan hern Hannſen von Paldramſtorff lawtterleich durch gots willen dieſelb kapplaney zu Spital von erſt verlihen vnd den dem benantten hern Herman pfarrer daſelben zu Spital geſandt vnd preſentirt das in der darauf beſteͣtigt hat vnd haben demſelben capplan hern Hannſen vnd allen ſeinen nachkomen zu derſelben kapplaney geben für aigen zu einer ewigen ſteͣt die nachgeſchriben hab und gutt von erst zu Spital bey dem markcht ain müll mit zwain lawffenden ſtaͤmen vnd eine stamph die yeczund Chüncz Zymerman inne hat vnd einen anger bey ſeinem haws vnd einen chrawtgarten vnd vierczehen eͣkchern vnd dient für all ſachen newr vierczehn ſchilling Wiener phennig. Item aber daſelbs zu Spittal vor dem markcht do man gen Gmundwerts geet ain huben die Symon inne hat mit einem anger bey der Tra neben der flözzſtat gelegen vnd dint fur all ſach achtzehen ſchilling Wiener. Item ze Treflikg zw einem güt das vnd des Hanſer hof mit der hawſung vnd hoffſtat iſt gelegen dient yecz aller ain phunt Wiener oder ain markch Agler vnd zu demſelben güt gehort auch ein ſtamph. Item Hanns Dürrekker zu ſand Jacob ob Vedendorff am perg im Obernpach dint von dem gut daſelbs da er yeczund heͣwfleich auf iſt geſeſſen zwainczig Agler phennig nucz drithalben virling rokken funff virling gerſten drithalben virling habern zehen vierling ein tugent zwo ſchulter drew hüner vnd dreyſſig ayr. Item aber ein güt daſelbs ob Bedendorff am perg genant die Leytten das yeczund Jacob zu sand Pawlo inne hat vnd zu pawt vnd dient dauon aller ſachen geleich als der genantt Dürekker. Item aber ein lehen daſelbs zu ſand Jacob genantt an dem Podweſch das Hanns Klauphrer bezymert vnd beſeſſen hat vnd dient dauon ein halb phunt Wiener pfennig. Item vnd von einem zehentlein zu ſand Pawls ob Vedendorff am perg von vier güttern dient yeczund Nikl Kraſnikg fünfthalben ſchilling Wienner pfennig. Item von einem lehen am wenigen Ekken dient yecz Vlreich von Nuſſdorf ein halb phunt Wiener pfennig. Item von dem lehen zu Sagoritſchach im pach das Petter Frankchawer innen hat vnd zupawt vnd diennt dauon fünff ſchilling Wiener pfenig. Item Hanns Ducher ze Techendorff dient von einez lehen sechs ſchilling Wiener pfenig. Item Hanns Scherer ze Wernhartſdorff dient von einem akcher zwainczig Agler pfenig. Item von ſechs eͣkchern die zu Spital vor dem markt im velld gelegen ſind vnd zu der hofstat gehorn die wir mit Jörgen Wildeſhaymer zu Traburg awſſgewechſelt vnd zu der vorbenantten vnſerer newen kapplaneyn geben haben vnd dient yeczund Petter Motnitzer dauon ſex ſchilling Wienner pfennig. Item vnd einen drittail des kornzehendts im Stakenboy gantz nach dem vnd ſich derſelb zehent ieͣrt nichts auſſgezogen denn die tugent die haben wir vnſſelb behallden. Wir haben auch geordent vnd geſtifftet das nu hinfür ewichleichen die obgenantten lewt vnd holden all oder wer die ſein die dieſelben vorgenantte gütter beſitzen vnd innehaben werden demſelben hern Hannſen kapplan vnd allen ſeinen nachkomen mit den obgenanten ieͣrleichen diensten vnd nüczen gewertig vnd gehorſam ſein ſüllen zu gewonleich vnd pilleich zeit als irem zinſheren vnd ſy ſullen im all iar ieͣrleichen dhainer awſſgenomen einen tag tagwerch vnd rabat tün fürderleichen vnd an widerred ſo ſy darumb ermandt werden vnd das dieſëlb kapplaney vnd stifft deſtpazz befeſtent werde, haben wir dem benantten hern Hannſen kapplan vnd allen ſeinen nachkomen zu derſelben kapplaneyn geben vnd ingeantwurt das almüſen vnd seelgereͣt das der obgenant vnſer öheim graf Fridreich von Ortenburg ſelig vnd ſein voruordern in der obgenanten pfarrkirchen zu Spital all kottember mit fünff vnd zwainczig brieſtern ze begeen geſtifftet haben inſolhermass das ſy daſſelb almuſen vnd ſeelgerët nu hinfür zu einer hilff vnd peſrung inne haben ſullen vnd mügen doch alſo das ſy das mit begeen vnd anderer ordnung ordentleichen auſſrichten in aller der maſſe als dann der stifftbrief daruber lawtt vnd aigenleichen inne halldet vnd begreyffet vnd ob ſy das nach lawt deſſelben stifftbriefs in allen pündten vnd artikelen nicht auſſrichten noch volbreͣchten das ſich alſo wiſſentleich funde so mügen wir oder vnſer erben dann das obgenant almuſen vnd seeelgereͣt von in nemen vnd das andern lewtten inantwurten vnd emphelhen die das volbringen vnd volfürn in allen ſachen nach lawt des stiftbriefs vnd wie es mit allter her kome iſt vnd wir geben dem ogenanten vnſerm kapplan vnd allen ſeinen nachkömen ganczen vnd vollen gewalt das ſy die egenantten gütter vnd hab was wir in zu derſelben vnſer ſtift geben vnd ingeantwrt haben ſelb beſetzen vnd entſetzen ſtiften vnd ſtören vnd allen wen vnd der ſtift nucz vnd frumen damit gehandeln vnd tün ſullen vnd mügen ſo ſy beſt künen oder wiſſen angeueͣrd vnd was derſelben gütter öd ſind oder öd werden die ſüllen in vnſer purkgrauen vnd ambtlewt wer die ſein gegenwürtig vnd kümpftig getrëwlichen beholffen ſein zebeſeczen ſo des durft iſt angeuͣerd vnd das ſelb vnſer ſtifft bey iren krefften deſtbass beleiben müg haben wir wolbedeͣchtikleich die obgeſchriben lewt vnd gütter die yetzund darczu gehörn vnd auch ander gütter di nachmalen dartzu gehoren wurde gefreyet vnd gevrlawbt freyen vnd vrlawben die auch wiſſentleichen in krafft des briefs in ſolhermass das wir noch vnſer erben vnd nachkömen noch die die herrſchafft Ortenburg erben vnd beſitzen werden, noch vnſer hawbtlawt pfleger purkgrauen oder richter noch yemandt anderer von vnſern wegen dhaynerlay damit von gerichts wegen zeſchaffen haben ſüllen noch wellen sunder das der obgenant her Hanns der yecz kapplan da iſt vnd all die die nach im kümpftikleich kapplen da werden ſelb oder ir anwellt darüber hören vnd richten ſullen mit vollen gewallt vmb all ſachen wie ſich die verhanndeln dann alain vmb den tod nicht den ſullen vnſer richter richten aber di püzz daraus vnd all ander püſs ſullen ſy ſelb von in innemen doch inſölher beſchaidenhait das die gütter von des wegen nicht geodet noch verderbt werden vnd dieſelb püzz ſüllen ſy innemen vnd behallden damit ſy den gotſdinst in der kirchen deſtlöblicher volbringen vnd ir hawſung auch deſtpazz gepeſſern vnd gepawen mügen wenn des not iſt angeueͣrd es ſüllen auch dieſelben leẅt all aller tagwerch vnd rabat vnd auch stewr von vns vnd vnſeren erben vnd nachkomen nu hinfür geͣnczlichen frey vnd uͣberhaben ſein. Wir gebieten auch ernſtleichen allen vnſern egenantten hawbtlewten phlegern purkgrafen richtern vnd ambtlewten vnd yedem beſunder daſelbs vmb geſeſſen vnſer herſchafft Ortenburg das ſy den genantten vnſern kapplan vnd all ſein nachkomen gütter lewt vnd gütter bey der vorgenantten freyung veſstikleichen halden vnd ſchermen an aller ſtat vnd ſelb dawider nicht hanndeln noch tün in dhainer weis vnd wer dawider teͣt den maynen vnd wellen wir vnſer erben vnd nachkömen der herſchafft Ortenburg ſwerleich darumb peſſern an leyb vnd güt. Mit vrkundt des briefs verſigelt mit vnſerm anhangenden inſigel geben zu der Kreͣppin an sand Barbara tag anno domni milleſimo quadringenteſimo triceſimo tertio.
Beschreibung
1 Sig. pend. l. besch. (Risse), Hermann II., Graf von Cilli, rotes Wachs in brauner Schale, 44 mm
Perg., 57 x 33 cm Plica 5 cm, einige grüne Flecken
Archivvermerke
verso
Portia B No (Stempel) 7
1433 dez. 4
No 52 2
LANDES-ARCHIV IN KÄRNTEN (Stempel)
stüfft-brüef graf Hermans zu Cili vnd Orttenburg von dem Anna alter vnd dazugehoriger kaplaneÿ zu Spittäll zu deſſen besſſrer subsistenz auch beÿgefügt wird dz von graf Fridrich zw Ortenburg gemahte legatum dem 25 quatember meſſen
Anno 1433.
Überlieferung
Ausfertigung
Kärntner Landesarchiv, Herrschaftsarchiv Porcia 7 (1433 XII 4)
Nachweise
Druck
Christian Domenig, Die Urkunden der Grafen von Cilli (1341-1456). Bd. 2., Nr. (in Bearbeitung).
Regest
Domenig, Christian: "tuon kunt". Die Grafen von Cilli in ihren Urkunden (1341-1456). Diss. Klagenfurt 2004, Nr. 224, 174. OBV
