U-1405-05-14-0001
1405 Mai 14, Wien
Regest
Herzog Wilhelm bestätigt der Stadt Klagenfurt den Jahrmarkt zu Marä Geburt.
Transkription
WIR Wilhalm von gots gnaden herczog ze Oͣſterreich, ze Steÿer ze Keͣrnden vnd ze Krain, graff ze Tyrol etc. Bekennen daz für v̈ns kömen vnſer getrewn n. der richter n. der rat vnd n. die purger gemainkleich ze Chlagenfurt vnd gaben v̈ns zu erkennen wie daz sÿ von alter vnd güter gwonhait ainen jarmarkt jerleichen an v̈nser frawn tag als sÿ geporen iſt mit ainer freÿung langczeit herbracht hietten. Vnd paten vns dÿemütikleichen, daz wir in, denſelben jarmarkt mitſamt der freÿung gerüchten zebeſteͣtten. Haben wir angeſehen ir fleizzüg pet vnd haben da durch vnd auch durch frumens vnd aufnemens willen derſelben vnſerr statt vnd aller vnſer vndertanen reicher vnd armer daſelbs geſezzen, von ſundern gnaden vnd auch von furſtleicher meͣchtikait, denselben jarmarkt vnd die freÿung beseͣtt vnd besteͣtten die auch wiſſentleich mit kraft dicz brieues darczü wir in auch beſtetten alle die rechten gnaden freyhaiten vnd gu[ten] gewonhaiten, als ander vnſer stett daſelbs in Keͣrnden habent. Welher aber die freÿung [ent]füre vnd zerbreche der iſt vnſern erben vnd nachkomen veruallen, vnd phlichtig zegeben, aller der pen die ander vnſer stett in Keͣrnden darauf habent. Dauon gepieten wir vnſern lieben getrewn n. allen vnſern haubtleuten herren bauern vnd knechten phlegern burggrauen richtern purgern vnd allen andern vnſern vndertanen vnd getrewn den diſser brief geczaigt wirdt vnd wellen ernſtleichen daz si die vorgen. vnſer purger zu Klagenfurt bey diſer vnſerr bestetung vnd gand lassen geͣnczleich beleiben, vnd in an iren rechten freÿhaiten vnd gnaden die wir in von ſundern gnaden vnd von fürſtleicher meͣchtikait besteͣtt vnd gegeben haben dhain irrung noch hindernuzz nicht tün noch das yemand zetün geſtatten in dhain weis welich aber dawider teͣtten die wiſſen ſich ſweͣrleich wider vnser huld vnd gnad getan haben. Vnd des ze vrkunt geben wir in den brief verſigelten mit vnſerm anhangundem inſigel. Der geben iſt ze Wienn an phincztag nach ſand Pangreczen tag. Nach Kristi gepürd vierczehenhundert jar darnach in dem fünften jare.
Beschreibung
Ausf. Perg.
1 Sig. pend. ab.
Archiv
Ausfertigung
Kärntner Landesarchiv, Klagenfurt, Stadt, Urkunden der Stadt Klagenfurt, B 7 St (AT KLA 97/B 7 St) [AT-KLA 999-B-7 St].
Nachweise
Regest
Wiessner, Hermann: Die Kärntner Geschichtsquellen 1335–1414 (Monumenta historica ducatus Carinthiae 10). Klagenfurt 1968, Nr. 1081 S. 360. OBV
Literatur
Zechner, Karlheinz: Die Rechte der Kärntner Städte im Mittelalter und ihr Zusammenhang mit den Stadtrechten außerhalb Kärntens. Würzburg 1938, S. 37. [1]
