U-1330-09-23-0001
1330 September 23, Innsbruck
Regest
Herzog Heinrich VI. von Kärnten bestätigt dem Kloster St. Paul im Lavanttal seine Privilegien.
Transkription
WIR Heinrich von gotes genaden chunik ze Behaim vnd ze Polan, herzog ze Chernden, vnd graue ze Tyrol vnd ze Goͤrtz, vogt der gotshauser ze Aglay ze Triende vnd ze Brixen, verichen an disem prieue daz fuͤr vns chom der ersam apt Heinrich von Sand Pauls in dem Lauental vnd liez vns sehen vnd hoͤren die hantfest die er vnd sein gotshaus vnd seins gotshaus samnunge hat von pæbsten von Chaisern vnd von anderen herzogen ze Chernden vnd pat vns mit ganczem erenst vnd fleiz, daz wir im vnd seinen nachchomen vnd seinem gotshaus vnd der samnunge da selben die selben hantfest stete behielten ewichleich. Nu haben wir des vorgenanten apt Heinriches zeitleicher pet an gesehen vnd durch gotes liebe vnd vnser vnd vnsern vordern sel hails willen loben wir im seinen nachchomen vnd der samnunge des oftgenanten gotshaus von sand Pauls, alle die hantfest, die si von allen pæbsten, chaisern, vnd herzogen von Chernden habent stete vnd vnzerbrochen zebehalten ewichleich in aller der weis als die hantfest sprechent die sie von in inne habent, des sint gezeuge vnser lieber oheim Meinhart, Albrecht vnd Mainhart die edlen grauen ze Ortenburch vnd vnser getrewe Chunrat von Auuenstain marschalch vnd hauptman ze Chernden, Heinrich der Gralant, Vlrich vnd Peter von Liebenberch, Reinher der schench von Osterwicz, Otto von Himelberch, Chole, Volker vnd Mathei von Flachsperch vnd ander erber lute genuͦch. Vnd daz dem vorgenantem apt vnd seinen nachchomen vnd dem gotshaus vnd der samnunge, daz stete vnd vnzerbrochen beleibe, geben wir in disen prief versigelten mit vnserm hangendem insigel, der ist geben ze Inspruk da man zalt von Christes geburt tausent drew hundert jar vnd dreizzich jar des suntages vor sand Michels tak.
Beschreibung
Ausf. Perg.
1 Sig. pend.
Archiv
Ausfertigung
Haus-, Hof- und Staatsarchiv, Allgemeine Urkundenreihe, 1330 IX 23
Nachweise
Regest
Beda Schroll, Urkundenbuch des Benedictiner-Stiftes St. Paul in Kärnten (Fontes Rerum Austriacarum II/39). Wien 1876, Nr. 205, S. 219 Digitalisat OBV
Internet
http://www.mom-ca.uni-koeln.de/mom/AT-HHStA/StPaulOSB/1330_IX_23/charter
