U-1296-07-29-0001

1296 Juli 29, Radstadt

Regest

Herzog Albrecht I. von Österreich bezeugt Graf Ulrich von Pfannberg den Verkauf der Burg zu St. Peter mit Landgericht und Zubehör an die Brüder Friedrich und Heinrich von Stubenberg.

Transkription

Wir Albreht von gotes genaden herczog ze Oͤsterreich vnd ze Steyr herre van chrain van der Marich vnd van Portenawe veriehen offenleich vnd chunden allen lauten di disen brief sehent oder hoͤrent daz der edel graf Vlreich von Phanneberch vnser lieber getrewer mit guetem willen vnd verdahtem muet verchauft hat sein purch dacz sand Peter vnd auch daz lantgeriht daz dar zwͦ gehoͤrt mit samt dem vrbare vnd laute vnd guet vnd vogtey verlehent vnd veruorlehent gesueht vnd vngesueht allez daz dar zwͦ gehoͤret als ez sein vodern an in geerbet habent seinen ohaimen Friderihen vnd Hainrichen bruedern von Stubenberch vnsern lieben getriwen vnd ist auch des selben guotes gewert vnd hat in auch daz vorgenant guet vnd daz haus auf gegeben vor vns mit vnserm gueten willen in vnd iren erben ewichleich zebesitczen wan ez van vns lehen ist an so vil ob si an erben verfueren bede so sol daz selbe haus auf den vorgenanten grauen Vlreichen vnd auf seines chint wider erben dar vber ze einem vrchunde vnd ze einer sichern statichait geben wir in disen brief versigelt mit vnserm hangunden insigel. Der brief ist gegeben vor Rastat do van Christes gebuert ergangen waren tausent jar zwai hundert jar in dem sechs vnd nevntzigistem jar an dem nahsten sonnetage nach sand Jacobs tag.

Beschreibung

Ausf. Perg.

Archiv

Ausfertigung

Steiermärkisches Landesarchiv, Allgemeine Urkundenreihe, 1510