Göth Regesten Steiermark 310
Göth, Georg: Urkunden-Regesten für die Geschichte von Steiermark vom Jahre 1252 bis zum Jahre 1580. In: Mittheilungen des historischen Vereines für Steiermark 7 (1857), S. 242–268, S. 260-262.
310. 1412. Romae, 28. Januarii. Joannes (XXIII) Episcopus, servus servorum Dei, dilecto filio Abbati monasterii in Obernburg, Aquilegensis dioecesis, salutem et apostolicam benedictionem. Dignum arbitramur et congruum, ut illis se reddat sedes apostolica gratiosam, quibus ad id propria virtutum merita laudabiliter suffragantur. Exhibita siquidem nobis nuper pro parte dilecti filii Joannis Prunner, rectoris parochialis ecclesiae in Steinkirchen Pataviensis Dioecesis petitio continebat, quod olim parochiali ecclesia Sti. Georgii in Gonabiz, Aquilegensis dioecesis, quam quondam Petrus, ultimus ipsius ecclesiae Sti. Georgii rector, dum viveret, obtinebat, per ipsius Petri obitum, qui extra romanam curiam diem clausit, extremum vacante, dilectus filius nobilis vir Reinpertus Baro Baroniae de Walsee, verus patronus ipsius Ecclesiae Sti. Georgii, et existens in pacifica possessione, uel quasi juris praesentandi, rectorem ad eandem ecclesiam, dum vacat pro tempore, praefatum Joannem venerabili fratri nostro patriarchae Aquilegensi ad eandem ecclesiam Sti. Georgii sic vacantem infra tempus legitimum praesentavit; Cum autem sicut eadem petitio subjungebat, idem Joannes dubitet praesentationem hujusmodi ex certis causis viribus non subsistere, dictaque ecclesia adhuc, ut praefertur, vacare noscatur. Nos volentes dictum Joannem apud nos de vitae ac morum honestate, aliisque probitatis et virtutum meritis multipliciter commendatum, horum intuitu favore prosequi gratioso directioni tuae per apostolica scripta mandamus, quatenus si post diligentem examinationem, eundem Joannem ad hoc idoneum esse reperieris, super quo tuam conscientiam oneramus, ecclesiam S. Georgii praedictam, cuius fructus, redditus et proventus viginti quinque marcharum argenti secundum communem existimationem valorem annuum, ut ipse Joannes asserit, non excedunt, sive ut praemittitur sive alias quovismodo, aut alterius cujuscunque personae seu per constitutionem felicis recordationis Joannis Papae XXII praedecessoris nostri, quae incipit execrabilis vacet etiamsi tanto tempore vacaverit, quod eius collatio juxta Lateranensis statuta concilii ad sedem praedictam legitime devoluta, vel ipsa ecclesia Sti. Georgii dispositioni apostolicae specialiter reservata existat, dummodo tempore dati praesentium, non sit in ea alicui specialiter jus quaesitum, cum omnibus juribus et pertinentiis suis praefato Joanni auctoritate nostra conferas et assignes, Inducens per te, vel alium seu alios eundem Joannem uel procuratorem suum ejus nomine in corporalem possessionem ecclesiae Sti. Georgii juriumque et pertinentiarum praedictorum et defendens inductum amoto exinde quolibet illicito detentore, ac faciens sibi de ipsius ecclesiae Sti. Georgii fructibus, redditibus, proventibus, juribus et obventionibus universis integre responderi, contradictores auctoritate nostra appellatione postposita compescendo, non obstantibus, si aliqui super provisionibus sibi faciendis de hujusmodi vel aliis beneficiis ecclesiasticis in illis partibus speciales vel generales dictae sedis vel legatorum ejus litteras impetrarint, etiamsi per eas ad inhibitionem, reservationem et decretum, vel alias, quomodolibet sit processum, quibus omnibus praefatum Joannem in assecutione dictae ecclesiae sancti Georgii volumus anteferri, sed nullum per hoc eis quod assecutionem beneficiorum aliorum praejudicium generari. Seu si patriarchae Aquilegensi pro tempore existenti, vel quibusvis aliis communiter vel divisim a dicta sit sede indultum, quod ad receptionem, vel provisionem alicuius minime teneantur et ad id compelli, aut quod interdici, suspendi uel excommunicari non possint, quodque de hujusmodi vel aliis beneficiis ecclesiasticis ad eorum collationem, provisionem, praesentationem, seu quamvis aliam dispositionem conjunctim vel separatim spectantibus nulli valeat provideri, per litteras apostolicas non facientes plenam et expressam, ac de verbo ad verbum de indulto hujusmodi mentionem et qualibet alia dictae sedis indulgentia generali et speciali cujuscunque tenoris existat, per quam praesentibus non expressam, vel totaliter non insertam effectus earum impediri valeat, quomodolibet vel differi, et de qua cujusque toto tenore habenda sit in nostris litteris mentio specialis. Aut quod dictus Joannes, ut asseritur, parochialem ecclesiam in Stainkürchen praedictam noscitur obtinere. Volumus autem, quod ipse Joannes, quam primum vigore praesentium praedictam ecclesiam Sti. Georgii fuerit pacifice assecutus, eandem ecclesiam in Stainkürchen, quam ut praefertur, obtinet, quamque ex tunc vacare decernimus, omnino dimittere teneatur. Et insuper si dictus Joannes ad hoc repertus fuerit idoneus, ut praefertur, ex tunc perinde irritum decernimus et inane. Si secus super his a quoquam quavis authoritate scienter vel ignoranter contigerit attentari, ac si die datarum praesentium eidem Joanni ad hoc reperto idoneo de dicta ecclesia Sti. Georgii cum interpositione decreti provideri mandavissemus. Datum Romae apud S. Petrum V. Calendas Februarii, Pontificatus nostri anno secundo. Tom. IV. p. 768.
