Göth Regesten Steiermark 265
Göth, Georg: Urkunden-Regesten für die Geschichte von Steiermark vom Jahre 1252 bis zum Jahre 1580. In: Mittheilungen des historischen Vereines für Steiermark 7 (1857), S. 242–268, hier S. 248-251.
265. 1393. Perusii. 5. Julii. BONJFACJVS Episcopus, seruus seruorum Dei, ad futuram rei memoriam. Magnae deuotionis et Sinceritatis affectus, quem Venerabilis frater noster Joannes Patriarcha et dilecti filij Capitulum Aquilegense, nec non nobilis Vir Hermannus Comes Cilliae ad nos et Romanam Ecclesiam gerere comprobantur, non indigne merentur, ut uotis eorum illis praesertim, per quae Ecclesiarum utilitas procuratur, quantum cum Deo possumus, fauorabiliter annuamus. Sane petitio pro parte ipsorum Patriarchae, Capituli et Comitis nobis nuper exhibita, continebat, quod olim praefatus Patriarcha ad hoc, quod Sancti Martini in Tiuer, sancti Martini in Ponikel, Beatae Mariae Virginis in Gurkfeld, Sanctae Margarethae in Godiz, Sanctae Crucis prope Rohatsch, et Sancti Ruperti prope Nassenfues, Aquilegensis Dioecesis Parochiales Ecclesiae in terris seu locis, quorum dominium temporale ad eundem Comitem pertinet, consistentes, et quarum collatio et prouisio, nec non quaevis alia dispositio ad patriarcham Aquilegensem pro tempore existentem, tunc pertinebat, ut earum iura melius et salubrius conseruarentur, ac etiam ex certis alijs rationabilibus causis eundem Patriarcham mouentibus ad hoc ipsorum Capituli accedente consensu, ius Patronatus ipsarum Ecclesiarum, quarum fructus, redditus et prouentus Ducentarum Marcarum argenti, secundum communem existimationem ualorem annuum, ut asseritur, non excedunt, seu praesentandi personam idoneam ad quamlibet ipsarum Ecclesiarum, cum ipsas Ecclesias pro tempore uacare contingeret, in Rectores praefato Patriarchae pro tempore existenti, eidem comiti, suisque haeredibus donauit, licet de facto, prout in authenticis litteris ipsorum Patriarchae et Capituli sigillis munitis, quarum tenor inferius de uerbo ad uerbum describitur, plenius continetur, ipseque Comes possessionem iuris Patronatus huiusmodi earundem Ecclesiarum praetextu eiusdem donationis extitit, assecutus similiter de facto. Quare pro parte praedictorum Joannis Patriarchae et Capituli, nec non Comitis, fuit nobis humiliter supplicatum, ut Donationi praefatae robur Apostolicae firmitatis adjicere de speciali gratia dignaremur. Nos igitur, ut eorumdem Patriarchae et Capituli, et Comitis Deuotio huiusmodi ad Nos et eandem Romanam Ecclesiam feruentius augeatur, huiusmodi supplicationibus inclinati, donationem praedictam, et omnia inde secuta, rata habentes et grata illa ex certa scientia, Authoritate Apostolica confirmamus, et praesentis scripti patrocinio communimus. Supplentes omnes defectus, si qui forsan interuenerint in eisdem. Tenor uero dictarum litterarum sequitur, et est Talis:
Joannes, Dei Gratia, Sanctae Sedis Aquilegensis Patriarcha, Magnifico Domino Hermanno, spectabili Comiti Cilliae, nostro Vasallo et amico percarissimo salutem cum dilectione sincera. Grata, indefessa, atque fidelia uestrorum praedecessorum obsequia, quae nostrae Aquilegensi Ecclesiae nostrisque praedecessoribus promtissime, ut clare percepimus, impenderunt, uosque nobis et ipsi Ecclesiae impendere fidelissime non cessatis, ac per uos et haeredes uestros Nobis, successoribus nostris, et ipsi Ecclesiae impendi speramus, dante domino feruentius in futurum, prompta etiam fidelitas et magni labores, quos circa recuperationem istarum et aliarum Ecclesiarum per manus Tyrannicas, Nobis et ipsi Ecclesiae occupare, indebite molientes, violenter detentarum merito et rationabiliter nos inducunt, ut uobis reddamur ad gratiam et singularem beneuolentiam Liberales, et personam Vestram, quantum cum Deo possumus, congruis fauoribus et gratiis extollamus, uolentes itaque praemissorum intuitu, eandem uestram honorare personam gratiamque facere specialem, uobis uestrisque haeredibus in sex parochialibus Ecclesiis, seu Plebibus infra scriptis, in nostra Dioecesi constitutis, videlicet Sancti Martini in Tiuer, Sancti Martini in Ponikl. Beatae Mariae Virginis in Gurkfeld, Sanctae Margarethae in Godiz, Sanctae Crucis prope Rohats, et Sancti Ruperti prope Nassenfues, quarum Parochialium Ecclesiarum collatio, prouisio et omnimodo dispotio ad Nos et ipsam nostram Ecclesiam Aquilegensem pleno iure dignoscitur pertinere, ius Patronatus concedimus per Praesentes, ac quandocunque et quotiescunque ipsae Ecclesiae Parochiales uel earum aliqua de caetero uacare contigerit, Presbyterum seu Presbyteros idoneum uel idoneos, morum et honestate uenustos in aetateque legitima constitutum aut constitutos aliaque simoniata prauitas inde non interueniat, siue dolus, super quibus Vestram et haeredum uestrorum conscientiam oneramus autoritate propria ad ipsas et ipsarum quamlibet inueniendi, eligendi, ac nobis uel nostris successoribus in perpetuum praesentandi omnibus modo, iure et forma, quibus melius et efficacius possumus per nos et successores nostros, ac uice et nomine nostrae Aquilegensis Ecclesiae supradictae licentiam et authoritatem, tenore praesentium concedimus et plenariam facultatem, ita quod illum, uel illos presbyterum uel presbyteros, quem uel quos ad ipsas Parochiales Ecclesias, uel earum aliquam de caetero uos, uel haeredes uestri, dum eas uel earum aliquam uacare contingerit, ut praefertur, elegeritis, nobisque uel ipsis nostris successoribus praesentaueritis, dummodo sit seu sint idoneus uel idonei, ut praemittitur. Nos et praefati nostri successores teneamur et teneantur ex debito sine contradictione aliqua seruatis seruandis confirmare, ac eum et eos de ipsis ecclesiis et earum qualibet inuestire, ac curam animarum et administrationem bonorum omnium spiritualium et temporalium committere in forma Ecclesiae consueta. In cuius rei testimonium et perpetuum plenum robur praesentes scribi iussimus, nostrique sigilli appensione muniri. Datum in nostro Patriarchali palatio nostrae ciuitatis Austriae, die vigesimo octauo Decembris, Anno Domini Millesimo Trecentesimo, nonagesimo tertio, indictione prima.
Nos Thomasinus de Forlinio, Vicedecanus, Antonius de Ranchonis de Vtino, Bartholomaeus de Pobio, et Franciscus de Vtino, Canonici Ecclesiae Aquilegensis, facientes Capitulum, et tamquam Capitulum ipsius Ecclesiae, cum plures Canonici ipsius Ecclesiae tunc non essent, qui possint tunc ipsi Capitulo interesse, euocatis omnibus euocandis, congregati more et loco solitis ad infrascripta specialiter facienda, uisa, lecta, et audita littera suprascripta concessionis per praefatum reuerendissimum patrem et dominum dominum Joannem Patriarcham Aquilegensem de iure Patronatus ipsi Domino Patriarchae et eius successoribus spectante, in parochialibus ecclesiis infra scriptis, uidelicet Sancti Martini in Tiuer, Sancti Martini in Ponikl, beatae Mariae Virginis in Gurkfeld, Sanctae Margarethae in Godiz, Sanctae Crucis prope Rohats, et Sancti Ruperti prope Nassenfues, factae antedicto Magnifico Domino Hermanno Comitis pectabili Comiti Cilliae concessioni authoritati praestitae inueniendi, eligendi, et praesentandi Presbyteros ad quamlibet dictarum Ecclesiarum idoneos, et inuestiturae de eis fiendae, et curae animarum, et administrationis bonorum eorum spiritualium et temporalium committendae et omnibus aliis in dicta littera contentis, in quantum de iure possumus, nostrum praebemus consensum pariter et assensum. In quorum omnium testimonium hunc praesentem consensum nostrum mandauimus sigilli capituli nostri munimine roborari.
Datum in Capitulo nostro Aquilegensi, die vigesimo quinto mensis Februarii, Anno Natiuitatis Dominicae Millesimo Trecentesimo Nonagesimo tertio, Indictione prima. Nulli ergo omnino hominum liceat, hanc paginam nostrae Ratihabitionis, confirmationis, communitionis et supplectionis infringere, uel ei ausu temerario contraire, si quis autem hoc attentare praesumpserit, indignationem omnipotentis Dei, et Beatorum Petri et Pauli Apostolorum eius se nouerit incursurum. Datum Perusii 5. Julii Pontificatus nostri Anno quarto. Tom IV. p. 597.
