Göth Regesten Steiermark 226
Göth, Georg: Urkunden-Regesten für die Geschichte von Steiermark vom Jahre 1252 bis zum Jahre 1580. In: Mittheilungen des historischen Vereines für Steiermark 6 (1855), S. 248–272, hier S. 266f.
226. 1382. 20. Decembris. Philippus de Alenconio miseratione diuina Episcopus Sabinensis, Sanctae Romanae Ecclesiae Cardinalis, et Patriarcha Aquilegensis Dilecto in Christo filio Vrbano dicto Frankh, Presbytero nostrae aquilegensis Dioecesis, Salutem in domino. Laudabilia tuae probitatis et uirtutum merita, quibus apud nos fide dignorum commendaris testimonio, rationabiliter nos inducunt, ut personam tuam fauore prosequentes beneuolo tibi reddamur in exhibitione gratiae Liberales. Cum itaque Parochialis Ecclesia seu plebes Sancti Paterniani nostrae Aquilegensis Dioecesis, cui cura imminet animarum, uacet seu uacare noscatur, ad praesens per obitum Presbyteri Henrici ultimi eiusdem Ecclesiae seu Plebis Rectoris. Nos uolentes praemissorum meritorum tuorum intuitu, nec non ad praesentationem precumque instantiam spectabilis Friderici Comitis in Ortenburg asserentis, se ius Patronatus obtinere in dicta parochiali Ecclesia seu plebe tibi gratiam facere specialem, eandem Parochialem Ecclesiam seu plebem sic vacantem, ut praemittitur, cum omnibus Juribus et pertinentiis suis, tibi tenore praesentium ordinaria authoritate conferimus, teque in ipsa plebe eiusque iuribus instituimus et plenarie confirmamus. Inuestientes dilectum filium in Christo Marquardum de Randech, Plebanum Villaci, nostrumque Carinthiae Archidiaconum procuratorem tuum in hac parte specialiter constitutum, per nostrum annulum praesentialiter de eisdem tibique Curam animarum et administrationem bonorum omnium tam spiritualium, quam temporalium eiusdem parochialis Ecclesiae seu plebis plenarie committentes, saluo semper iure nostro, nostrae Aquilegensis Ecclesiae et alterius cuiuscunque. Et ut gratia nostra huiusmodi suum debitum consequatur effectum, dilectis in Christo filiis in Kellerberg et in Kemerich Ecclesiarum nostrae Aquilegensis Dioecesis Plebanis et utrique ipsorum in solidum harum tenore committimus mandantes, quatenus ipsi ambo uel eorum alter te uel procuratorem tuum nomine tuo in tenutam et corporalem possessionem supra dictae Ecclesiae seu Plebis aucthoritate nostra ponat et inducat, ac defendat inductum faciatque tibi uel dicto Procuratori tuo per te de fructibus, redditibus, prouentibus, iuribus et obuentionibus vniuersis eiusdem Ecclesiae seu plebis, amoto exinde quolibet detentore illicito plene et efficaciter responderi, contradictores et rebelles auctoritate nostra praefata per censuram ecclesiasticam compescendo. Harum sub nostri appensione sigilli litterarum testimonio. Data in nostro Patriarchali Palatio nostrae Ciuitatis Austriae, Die vigesimo Decembris, Anno Domini Millesimo, Trecentesimo, octuagesimo secundo. Indictione quinta. Tom. IV. p. 646.
