Chmel Materialien 1/2 33

Materialien zur österreichischen Geschichte. Aus Archiven und Bibliotheken. Gesammelt und herausgegeben von Joseph Chmel. Erster Band. Zweites Heft. Wien 1837, S. 50f. Nr. XXXIII.

---

XXXIII.

29. May 1438.
Material. I. Regg. Nr. 211.

Das Stift Reichersberg gibt den Herzogen Friedrich und Albrecht v. Oesterreich einige Zehente auf 2 Jahre in Bestand.

Wir Pauls von gotes gnaden Brobst ze Reichersperg vnd der Conuentt gemainklich daselbs, Bekennen vnd tuenn kund für vns vnd vnser nachkommen Das wir den durchlewchtigen Hochgeboren fürsten Herczog Fridreichen dem Jüngern vnd Herczog Albrechten seinem Brueder Herczogen ze Österreich etc. vnsern genedigen Herren, die nachgeschriben vnser vnd vnsers Gotshauses zehennden in bestanndsweis hingelassen haben vnd lassen auch wissentlich mit dem brief auf zway ganncze Jar von sand Görgentag nu vergangen ze raitten die nachstn nacheinander künftig werden. Von erst den zehennt ze Aspanng den der Gfeller vor in bestanndsweis hat innegehabt, Item den zehent in der Putenaw den Vlreich am zehenthof vor hat gehabt Item den halben zehent In der Tawhen vnd am Sparberegk so her Ulreich Perner hat gehabt. Item den andern halben tail desselben zehents den her Dietreich Perner hat gehabt, Item den zehent zu krumpach den Vlreich Potschacher von hern Albrechts von Puechaim wegen gehabt hat Item den zehent zu Stalhof den her Niclas Seebekh vor hat gehabt ausgenomen den Weinzehent daselbs der zu vnsern hannden ist genessent worden vnd den wir auch noch ausziehen. Item den zehennt zu Holntann den her Chunrat Stikhelperger hat gehabt, Item die zehennt zu kirichslag, zu Liechtenegk vnd zu Wismad die her Albrecht von Potendorf vor in bestanndsweis Innegehabt hat, Dieselben zehennt all, ausgenomen was die pfarren daselbsumb gelegen Innhaben, damit haben Sy nichts ze schaffn. Haben wir den obgenanttn vnsern genedigen herren Herczog Fridreichen dem Jungern vnd Herczog Albrechten seinem Brueder die egenanttn zway Jar gelassn Inneczehaben ze vessen nuczen vnd nyessen, als solichs hinlassens vnd bestannds recht ist In solicher mass das Sy vns vnd vnsern nachkomen dauon alle Jar hundert vnd vierczik pfunt pfenning Lanndswerung Im lannd ze Österreich fürderlich geben vnd raichen sullen, Auch sullen Sy schaffen vnd verlassen dieselben zehennt die obgenanttn zway Jar getrewlich Innczehaben vnd ze bewaren, damit vns dauon nichts enczogcn noch empfromdt werde an alles geuerde. vnd wann sich dieselben zway Jar also nacheinander verlawffen vnd geenndet haben So sind vns vnd vnserm Gotshaws die obgeschribn zehenndn wider frey vnd ledig, vnd mugen dann vnsern frumen damit schaffen, mit Hinlassen, oder in annder weg wie vns verlustet nach vnsern notdurfftn an der vorgenantn vnserr genedigen herren Herczog Fridreichs des Jüngern vnd Herczog Albrechts seines Brueder Irer eriben, vnd meniklichs von Iren wegen irrung vnd widerred auch angeuerde vnd des zue vrchunde geben wir In den brief besigelten mit vnsern anhangunden Insigeln.

Der geben ist am phincztag nach sand Vrbanstag Nach Kristi geburde Im vierczehenhundert vnd achtvnddreissigisten Jare.